கடல் நீலம் மங்கும் நேரம்...

கவிஞர் தாமரை அவர்கள் எழுதிய 'முந்தினம் பார்த்தேனே ...' எனும் பாடலின் இடைவரும் வரி அது. கவிஞர்கள் தொட்டு அறிவியலாளர்கள் வரை வானத்தின் நீல நிறத்தையும் கடலின் நீல நிறத்தையும் வியந்து கண்டுள்ளனர். அதிலும் அறிவியலாளர்கள் வானம் மற்றும் கடல் ஏன் நீல நிறமாக உள்ளன என்ற வினாவிற்கு விடை காண முயன்றனர். அல் ஹசன் என்ற அறிஞர் "காற்றில் தூசிகள் உள்ளன. அவை தான் சூரிய ஒளியை சிதறச் செய்து நீல நிறமாக காட்டுகிறன" என்றார். டாவின்சி "இல்லை... ஒரு தனித்துவமான சிறு துகள்கள் தான் காரணம்" என்றார்.

 

டைசியில் 19ம் நூற்றாண்டில் ராலே (Raleigh 1842 - 1919) என்பவர் ஒளிச்சிதறலுக்குக் காரணம் காற்றில் உள்ள மூலக்கூறுகள் தான் என்று நிரூபித்தார். அதோடு "கடல் நீல நிறமாக இருப்பதற்கும் காரணம் அது வானத்தின் நீல நிறத்தை (கண்ணாடி போல்) எதிரொளிப்பதால் தான்" என்றார்.

  

ஆனால் கடலின் நீலநிறத்தை பற்றி ராலே கூறியது தவறு. அப்போது தான் சி வி ராமன் & அவருடைய குழு ஒளிச்சிதறல் பற்றிய ஆய்வில் ஈடுபட்டிருந்தனர். அதன் அடிப்படையில் ராமன், "கடல் நீல நிறமாக இருப்பதற்கு ராலே கூறியது போல் அது வானத்தை எதிரொளிப்பதால் அல்ல" என்றார். "மாறாக நீர் மூலக்கூறுகள் ஒளியை மாறுபாடு (diffraction) அடையச் செய்கிறது" என்றார். சூரியஒளி கடல் நீரினுள் புகுந்து சிதறுகிறது. அதிக அலைநீளம் உடைய (சிவப்பு - பச்சைநிற) ஒளிகளை நீர் மூலக்கூறுகள் உறிஞ்சிவிடும். நீல நிற ஒளி நீர் மூலக்கூறுகளில் பட்டு சிதறி வெளியேறிவிடும். (படத்தில் Diffraction என்பதற்கு பதில் Reflection என தவறாக உள்ளது)

 

இதற்கு பெயர் ராமன் விளைவு என்று கூறுகிறோம். இந்த யூடூப் காணொலியை பாருங்கள். தெளிவாக விளங்கும். இவ்வாறு பல ஆண்டுகளாக ஒளியை பற்றி ஆராய கடுமையாக தனது குழுவினருடன் ராமன் உழைத்தார். அவற்றை பற்றி பல ஆய்வு கட்டுரைகள் எழுதினார்கள்.

 

ஃபெப்ருவரி 28, 1928 அன்று ராமன் விளைவு கண்டறியப்படுகிறது. இதனை கண்டுபிடித்தது (சர்) சந்திரசேகர வெங்கட் ராமன் என்று அறியப்படும் (சர்.) சி. வி. ராமன் மட்டும் அல்லர். அவருடைய சக ஆய்வாளர் கரியமாணிக்கம் சிறீனிவாச கிருட்டினனும் அதில் அடக்கம். இதை சி வி ராமனே கூறியிருக்கிறார். அவர்களுடைய ஆராய்ச்சி "A Change of Wavelength in Light Scattering to Nature" (இயற்கையில் ஒளிச்சிதறலின் போது அலைநீளத்தில் ஏற்படும் மாற்றம்) என்ற தலைப்பில் அவர் பெயரை மட்டும் தாங்கி வெளியாகிறது. ஆனால் இந்த ஆராய்ச்சியில் க சி கிருட்டிணனின் பங்களிப்பை பலமுறை ராமனே
சொல்லியிருப்பதால் இதனை ராமன் - கிருட்டிணன் விளைவு என்றும் கூறுவர். ஆனால் ஆராய்ச்சி கட்டுரை அவர் பெயரை மட்டும் கொண்டதால் 1930 - ல் அவருக்கு மட்டும் ஒளிச்சிதறலை கண்டுபிடித்ததற்காக நோபல் பரிசு கிடைத்தது. ஆனால் கிருட்டிணன் அந்த அளவிற்கு புகழடையவில்லை. ஆனாலும் இருவரும் தொடர்ந்து பல ஆராய்ச்சி கட்டுரைகள் வெளியிட்டனர். (மேற்கண்ட தகவல் Ajoy Ghatak எழுதிய Optics என்ற கல்லூரிகளுக்கு பரிந்துரைக்கப்பட்ட புத்தகத்தில் ‘History of Optics' என்ற அத்தியாத்தில் உள்ளது.) இதன் பின் இந்த ஆராய்ச்சியில் சுகுமார் சந்திர சிர்கார் என்பவரும் இருந்த செய்தி வெளியாகிது. இவர் பெயர் ஏன் வெளிவரவில்லை என்பது சற்று சர்ச்சைக்குரியது.

 

இது ஒருபுறம் இருக்க, ராமன் - கிருட்டிணன் தாம் கண்ட "ராமன் - கிருட்டிணன் விளைவை" அறிவித்த ஒரு வாரத்திற்கு முன்பே அதாவது 21 ஃபெப்ருவரி 1928 அன்றே இரண்டு ரசிய இயற்பியல் அறிஞர்களான கிரகாரி லேன்ட்ஸ்பர்க் மற்றும் லியோனிட் மேன்டல்ஸ்டாம் இந்த ஒளிச்சிதறல் விளைவை அறிவித்தனர். ஆனால் நோபல் பரிசு கிடைத்தது என்னவோ சர் சி வி ராமனுக்குத் தான். அதனால் தான் ரசிய நாட்டவர்கள் இதனை ராமன் விளைவு என்று அழைக்கமாட்டார்கள். மாறாக Combination Scattering என்று தான் அழைப்பர். இந்த சர்ச்சை 2001 வரை நீடித்தது. அப்போது வெளிவந்த ஆய்வறிக்கை இதை முழுமையாக படம் பிடித்துக் காட்டியது.

 

ரசியர்கள் தங்களது ஆய்வு முடிவை அறிவித்தது 21 ஃபெப்ருவரி 1928. சி வி ராமன் தனது ஆய்வு முடிவை அறிவித்தது 28 ஃபெப்ருவரி 1928. ஆனால் சி வி ராமனுக்கு ரூதர்ஃபோர்ட், நீல்சு போர், ஸ்டார்க் ஆகிய அறிவியலாளர்களின் பெரும் ஆதரவு இருந்தன. மாறாக அந்த ரசியர்களுக்கு உள்ளூர் அறிவியலாளர்கள் ஆதரவு மட்டுமே இருந்தது. இதனால் நோபல் கமிட்டி வேறு விதமாக தடுப்பாட்டம் ஆடியது. சி வி ராமன் ஆய்வுக் கட்டுரை வெளிவந்தது 30 மார்ச் 1928. அந்த நேரத்தில் ரசிய அறிவியலாளர்களில் ஒருவர் ஏதோ பிரச்சனை காரணமாக சிறையில் இருந்ததால் கட்டுரை வெளியாகத் தாமதமாகியது. அவர் வெளியே வந்து ஆய்வு கட்டுரையை அனுப்பிவைப்பதற்குள் ராமனின் ஆய்வு விவரங்கள் அவருடைய கட்டுரை வாயிலாக உலகத்திற்கு தெரிவிக்கப்பட்டுவிட்டது. 

   

ஆனால் சிலர் இதனை ஏற்றுக்கொள்ளவில்லை. ராமனுக்கு இருந்த வலிமையான ஆதரவுடன் தான் பரிசை பெற்றார் என கூறுகின்றனர். உண்மையில் ராமன் உட்பட அந்த இரண்டு ரசியர்களுக்கும் கொடுக்கப்பட்டிருக்க வேண்டும். அத்துடன் ராமன் தன் சகாக்கள் பெயரை அந்த ஆய்வு கட்டுரையில் சேர்த்திருக்க வேண்டும்.