விபத்துக்குள்ளான கணிப்புகள்...

கொலம்பியா விண்கலம் (1972), சேலஞ்சர் விண்கலம் (1979) மற்றும் அட்லாண்டிஸ் விண்கலம் (1979) ஆகியவற்றை தயாரித்து முறையே 1981, 1983 & 1985ல் விண்ணில் ஏவும் போது நாசா நிர்வாக அலுவலர்கள் பெருமையாகச் சொன்னது, "நம்முடைய விண்கலங்கள் 99.999% நம்பகமான விண்கலங்கள்".

அதாவது 100,000 தடவை ஏவினால் 1 விண்கலம் விபத்துக்குள்ளாகும் என்று பொருள். (இதனைக் கேட்ட ரிச்சர்ட் ஃபெயின்மேன் அவர்களை காறித் துப்பியது வேறு கதை. அவர் மொழியில் "What is the cause of management's fantastic faith in the machinery?". அவர் கூறிய கருத்தின் பின்னனி, "தினமும் ஒரு விண்கலம் ஏவினால் 300 ஆண்டுகளுக்கு ஒரு முறை தான் ஒரு விண்கலம் விபத்துக்குள்ளாகும் - இதையெல்லாம் நம்புகிற மாதிரியா இருக்கு?'.)

ஆனால் வடிவமைத்து செயல்படுத்திய பொறியியலாளர்களின் கணிப்பில் விண்கலங்களின் நம்பகத்தன்மை 99%. அதாவது 100 விண்கலங்கள் ஏவினால் 1 விண்கலம் விபத்துக்குள்ளாகும்.

ஆனால் பாதுகாப்பு பொறியியலாளர்கள் (Range Safety Engineers) கோணத்தில் அதன் நம்பகத்தன்மை வெறும் 25ல்1 தான். அதாவது 25 முறை விண்கலங்களை ஏவினால் ஒரு விண்கலம் விபத்துக்குள்ளாகும் என்பது தான் அதன் பொருள். சேலஞ்சர் விண்கலம் 9 முறை ஒழுங்காகச் செல்லும் என்று இந்த பாதுகாப்பு பொறியியலாளர்கள் கணித்தனர்.

ஆனால் மூன்றையும் மாற்றி மாற்றி ஏவியதில் 26வது பயணத்தின் போது சேலஞ்சர் விண்கலம் (தனது 10வது பயணத்தில்) சனவரி 28, 1986ல் விபத்துக்குள்ளானது. இதில் 7 பேர் மாண்டனர்.

இதன் பிறகு பட்டுத் தெளிந்த நிர்வாகம் பாதுகாப்பு முறைகளை சரிசெய்தது.

இதன் வழியே கற்ற பாடத்தால் கொலம்பியா விண்கலத்தில் பழுதுகள் நீக்கப்பட்டு புதிய பாதுகாப்பு முறைகள் அறிமுகப்படுத்தி அதன் நம்பகத்தன்மையை 99.11% என்று கணக்கிட்டுக் கூறியது.

அந்த நேரத்தில் சுற்றுச்சூழல் பாதுகாப்பு அமைப்பு (EPA) ஃப்ரீயானை (Freon) பயன்படுத்த தடை செய்தது. நாசாவும் அதற்கு மாற்றாக வேறொரு வேதிப்பொருளை பயன்படுத்தியது. வெப்பம் கடத்தாத நுரைத்தகடை (insulating foam plate) எரிகலத்தின் வெளிச் சுவற்றில் ஒட்டவைக்க ஃப்ரேயான் (அல்லது அந்த மாற்று வேதிப்பொருளை) பயன்படுத்தினர்.

ஆனால் புதிய வேதிப்பொருளோ ஃப்ரேயான் அளவிற்கு சரியாக தகடை ஒட்டவில்லை. எனவே நாசா அந்த விண்கலத்தின் நம்பகத்தன்மையை மீண்டும் கணக்கிட்டு 98.51% என்று நிர்ணயித்தது. அதாவது கொலம்பியா விண்கலம் 38 முறை எந்த பிரச்சினையும் இல்லாமல் ஓடும் என்றனர்.

ஆனால் அது தனது 28வது முறை ஏவப்படும் போது சரியாக ஒட்டாத நுரைத்தகடு கழன்று விண்கலத்தில் மோதி அதில் சேதம் ஏற்படுத்தியது. அந்த ஃப்ரேயான் மாற்றத்திற்குப் பின் அது 21 முறைதான் பறக்க தகுதி வாய்ந்தது. கூடுுதலாக 6 முறை பறந்ததே பெரிய விசயம்.

 

ஃபெப்ருவரி 1, 2003ம் ஆண்டு அது தனது விண்வெளிப் பயணத்தை முடித்துவிட்டு புவி வளிமண்டலத்தில் நுழையும் போது வெடித்து சிதறியது. கல்பனா சாவ்லா உட்பட 7 பேர் மாண்டனர்.

அதன் பின், பொறியியல் வல்லனர்கள், தாம் கண்டறிந்த குறைகளையும் மீண்டும் முயன்று நீக்கி அட்லாண்டிஸ் விண்கலத்தை சீர்படுத்தினர். இப்போது அதன் நம்பகத்தன்மையை 98.48% ஆகக் குறைத்து 35 முறை ஏவலாம். விபத்துக்குள்ளாகாது என்றனர். ஆனால் 33வது பயணத்தை முடித்தவுடன் எதற்கு வம்பு என்று எண்ணி ஜூலை 2011ல் அதற்கு ஓய்வு கொடுத்துவிட்டனர். ஓய்வு பெற்ற விண்கலத்தை ஊர்வலமாக எடுத்துச் சென்றது நாசா

ஆனானப்பட்ட நாசா வல்லுநர்களுக்கே கணிப்புகள் தவறுகிறன. ஆகவே கணிப்புகளை கண்ணை  மூடிக்கொண்டு நம்பிவிடாது மிகுந்த எச்சரிக்கையுடன் செயல்பட வேண்டும்.

Reference: To Forgive Design, Understanding Failure (2012), by Henry Petroski