The Coldest Game (2020)...

உலகை அணு ஆயுதப் போரிலிருந்து காப்பாற்றிய ஒரு கணித மேதையை பற்றிய திரைப்படம் தான் இது.

1962ம் ஆண்டு.  அமெரிக்காவிற்கும் சோவியத் யூனியனுக்கும் இடையில் பனிப்போர் உச்சத்தில் இருந்த நேரம். 

அப்போது ஒருமுறை அமெரிக்க உளவுத்துறை நிபுணருக்கு யாரை நம்புவது என இக்கட்டான நிலை. 

ஒரு புதிர்: இரண்டாக பிரியும் ஒரு பாதை. நீங்கள் செல்ல வேண்டிய வழி எது என்று குழப்பம். அங்கு இரண்டு காவலாளிகள் உள்ளனர். ஒருவன் பொய் சொல்பவன். இன்னொருவர் உண்மை உரைப்பவர். உங்களுக்கு யார் பொய்யன் என தெரியாது. 

இப்போது அவர்களிடம் என்ன கேட்டு எப்படி சரியான வழியை தேர்வு செய்வீர்கள்?

1962 ஆண்டில் கியூபா நாட்டில் சோவியத், தனது அணு ஆயுதங்களை வைத்துக் கொண்டு ஃபளோரிடாவிற்கு 160கிமீ தூரத்தில் இருந்து அமெரிக்காவை அச்சுறுத்திக் கொண்டிருந்தது.

கென்னடிக்கு ஒரே குழப்பம். சோவியத்துடன் போரை தொடங்கலாமா வேண்டாமா? எனினும் 1 வாரத்தில் போரைத் தொடங்க ஆயத்தமானது அமெரிக்கா.

அதே நேரத்தில் போலந்து தலைநகர் வார்சாவில் செஸ் இறுதிப் போட்டி நடைபெற இருந்தது.

அமெரிக்காவின் கோனிஸ்பர்க் vs  சோவியத்தின் யூரி கேவ்ரிலோ அந்த போட்டியில் பங்கு பெறவிருந்த வீரர்கள்.

இடையில் திடீரென கோனிஸ்பர்க் மர்மமான முறையில் கொல்லப்படுகிறார். போட்டியைத் தடுக்க சோவியத் உளவுப்படையினரின் வேலை தான் இது என அமெரிக்காவிற்கு சந்தேகம். விளையாட்டு போட்டிக்காக கொலையா, என்று மனவோட்டம் ஓடுகிறதா? அதற்கு காரணம் இல்லாமல் இல்லை.

இதற்கு இடையில் கோனிஸ்பர்கிற்கு பதிலாக ஜோஷ்வா மான்ஸ்கி என்ற கணிதவல்லுனரை சிஐஏ பலவந்தமாக போலந்திற்கு அனுப்புகிறது. மான்ஸ்கி பிரின்ஸ்டன் பல்கலைகழகத்தில் ஐன்ஸ்டீனின் பழைய நண்பர் ஆவார்.

மான்ஸ்கி கணித மேதை மட்டும் அல்லர். செஸ் புலி வேறு. கோனிஸ்பர்கையே பல ஆண்டுகளுக்கு முன் இரண்டு முறை வென்றவர். ஒரு நோபல் வெற்றியாளரிடம் அடிதடியில் இறங்கி பல்கலைகழகத்திலிருந்து விலக்கப்பட்டவர்.

பல மாதங்களாக அணுகுண்டை கண்டுபிடிப்பதில் அல்லலுற்ற ஓப்பன்ஹைமர் இவரிடம் வந்து  கணித சமன்பாட்டை கொடுக்க, மின்னல் வேகத்தில் தீர்த்து அணுகுண்டை வெடிக்க உதவி செய்தவர். (பின் அந்த குற்ற உணர்வில் வாழ்ந்தவர்). மொடா குடிகாரர். Eccentric. இதுதான் நம் மான்ஸ்கி.

பலவந்தமாக இவரை வார்சாவிற்கு அனுப்பப்பட்ட காரணம், கியூபாவில் உண்மையில் அணு ஆயுதம் உள்ளதா அல்லது அமெரிக்காவை போரிடத் தூண்ட சோவியத் பொய் சொல்கிறதா என அறிய வேண்டிய கட்டாயத்தில் இருந்த கென்னடி.  

இதற்காக சோவியத் உளவுப்படையில் ஒரு அமெரிக்க உளவாளி இருந்தார். அவருடைய மறைபெயர் - கிஃப்ட். யாருக்கும் அவரை தெரியாது. அவர் கொடுக்கும் ஒரு நிழற்பட மீச்சிறுசுருளில் (microfilm) தான் உண்மை அடங்கியுள்ளது. அவரால் வார்சா வரைதான் சோவியத் செஸ் குழுவினருடன் வர இயலும்.

இந்த செய்தி அமெரிக்காவின் சிஐஏவில் உள்ள சோவியத் உளவாளி மூலம் சோவியத்துக்கும் தெரிந்துவிடுகிறது. ஆனால் அவர்களுக்கும் ஆள் யார் என்பது தெரியாது. ஒரே ஒரு சிஐஏ ஏஜண்டைத் தவிர.

அந்த தகவல் பரிமாற்றத்தை தடுக்கவே சோவியத் உளவுப்படை இந்த போட்டியை தடுக்கிறது. அதற்காகத் தான் வேறு வழியின்றி கோனிஸ்பர்கையும் கொன்றிருக்கலாம். 

அத்தனையும் மீறி மான்ஸ்கி சிஐஏவால் வார்சாவிற்கு கொண்டு வரப்படுகிறார்.

அப்போது கிஃப்ட்-ஐ அடையாளம் கண்ட சிஐஏ ஏஜண்ட் உடனே யாராலோ கொல்லப்படுகிறார்.

அந்த சிஐஏ ஏஜண்ட் சாகும் முன் மான்ஸ்கியிடம் கிஃப்ட்டின் அடையாளத்தை சொல்கிறார் -  "வலது கை பின் புறம் தழும்பு உள்ள ஒருவர் (ஓட்கா பாட்டில்) கார்க் மூடியில் அந்தச் சுருளை கொடுப்பார்" என்று கூறி மரணிக்கிறார். மான்ஸ்கி தன்னுடன் வந்த சிஐஏ ஏஜெண்டிடம் இதனை சொல்லிவிடுகிறார்.

இடையில் பரபரப்பாக செஸ் போட்டி நடைபெறுகின்றன. 4வது சுற்று செஸ் போட்டியின் இடைவேளையில் மான்ஸ்கி டாய்லெட் செல்கிறார்.

அங்கு ஒருவர், தான் கிஃப்ட் என்று கூறி ஒரு கார்க் மூடியை தருகிறார். அதே நேரத்தில் இடையில் இன்னொருவர் வந்து கிஃப்ட்டை கொன்றுவிட்டு, தான் தான் கிஃப்ட் எனக் கூறி அவரும் ஒரு கார்க் மூடியை தருகிறார்.

முதலாமானவர் கொடுத்த கார்க் போலி என்று கூறி அந்த "போலி"-ஐ சிதறிக் கிடந்த ரத்தத்தில் அடையாளத்திற்காக தோய்த்து தந்துவிட்டு சென்று விடுகிறார்.

இவ்வளவு கூத்துக்கிடையில் 4வது சுற்று ட்ராவில் முடிந்து  இரண்டு நாடுகளும் சம நிலையில் உள்ளன. 5வது போட்டி தான் வெற்றி தோல்வியை நிர்ணயிக்கும் போட்டி.

இதற்கு இடையே இரண்டு கார்க்களில் இருந்த படங்களை  சோதித்த சிஐஏ-க்கு குழப்பம். 

முதலாமாவன் கொடுத்த (ரத்தம் தோய்ந்த) கார்க் மூடியில் உள்ள தகவல் படி - கியூபாவில் சோவியத்தின் அணுஆயுதம்  உள்ளன.

இரண்டாமானவன் கொடுத்த கார்க் மூடியில் உள்ள தகவல் படி - கியூபாவில் சோவியத்தின் அணுஆயுதம்  இல்லை.

எது உண்மை? இன்னும் 24 மணி நேரத்தில் கென்னடிக்குத் தகவல் கொடுக்க வேண்டும்.

மீண்டும் அதே புதிர்: இரண்டாக பிரியும் ஒரு பாதை. நீங்கள் செல்ல வேண்டிய வழி எது என்று குழப்பம். அங்கு இரண்டு காவலாளிகள் உள்ளனர். ஒருவன் பொய் சொல்பவன். இன்னொருவர் உண்மை உரைப்பவர். உங்களுக்கு யார் பொய்யன் என தெரியாது. 

இப்போது அவர்களிடம் என்ன கேட்டு எப்படி சரியான வழியை தேர்வு செய்வீர்கள்?

யாராவது ஒருவரிடம் - "இன்னொரு ஆளிடம் நான் போகவேண்டிய வழியை கேட்டால் என்ன சொல்வார்?" -  என்று கேட்க வேண்டும்.

அந்த இன்னொரு ஆள் சொல்லும் வழிக்கு எதிர் திசையில் நீங்கள் செல்ல வேண்டும்.

இந்த தருக்கத்தை முன்வைத்தும் அப்போது இரண்டு பக்கமும் நிகழ்ந்தவற்றைக் கொண்டும், மான்ஸ்கி ஒரு தீர்வு தருகிறார். "கியூபாவில் அணு ஆயுதம் இல்லை".

கென்னடிக்குத் தகவல் விரைகிறது. போர் முயற்சி நிறுத்தப்பட்டு கியூபாவைச் சுற்றி ராணுவ பொருட்கள் கொண்டு செல்ல தடை விதிக்கப்பட்டது. காரணம், இதன் பிறகு சோவியத் உண்மையிலேயே அணு ஆயுதம் கொண்டுவரக்கூடாது அல்லவா?

கடும் சினமுற்ற சோவியத் படச்சுருளை அமெரிக்காவிற்கு கொடுத்த உளவாளியை பிடிக்க விழைகையில் மான்ஸ்கி 5வது போட்டியில் பங்கு பெற இயலாமல் போகிறது. இதனால் சோவியத் வீரர் வெற்றி பெற்றதாக அறிவிக்கப்படுகிறார். 

இவ்வாறு ஒரு பெரும் போர் தடுக்கப்பட்டது. இந்த நிகழ்வு அமெ - சோவியத் பனிப்போரின் ஒரு திருப்புமுனை.

மொடா குடியின் காரணமாக தான் மான்ஸ்கி இறுதி போட்டியில் கலந்து கொள்ளவில்லை அமெரிக்க செய்தி ஊடகங்கள் பழி சுமத்தி அவரை தூற்றியது.

நம்ம ஆள் எதற்கும் அசரவில்லை... குடியும் கால்குலசஸுமாக தன் வாழ்க்கையை வாழ்ந்தார்.

The power of logical reasoning... 💪