ஒத்ததிர்வு (Resonance)
1940 நவம்பர் 7. வாஷிங்டனில் மணிக்கு 65கிமீ வேகத்தில் காற்றடிக்கிறது. அந்த காற்றில் டகோமா குறும்பாலம் இடிந்து விழுகிறது. என்னடா இது? புல் தடுக்கி பயில்வான் போல காற்றடித்து பாலம் விழுகிறதா?
“ஐயா... பாலத்துக்கு உடம்பு சரியில்ல. அதா... காத்து ஒத்துக்கல..”
என்று சொல்லவும் முடியாது. ஏன்னா.. அதை கட்டி வெறும் 4 மாதங்கள் தான் ஆகியிருந்தது. இந்த நிகழ்வு பொறியியலாளர்கள், இயற்பியல் அறிவியலாளர்கள், கணிதவல்லுனர்கள் என எல்லாரையும் நிமிர்ந்து அமரச் செய்தது. இந்த விபத்திற்கு அவர்கள் கூறிய காரணம்... Resonance அதாவது ஒத்ததிர்வு. அப்டின்னா?
ஒரு பொருளின் மீது ஏதேனும் ஒரு விசை தாக்கினால் அப்பொருள் ஒரு குறிப்பிட்ட அதிர்வெண்ணில் (frequency number) அதிரும். எடுத்துக்காட்டாக ஒரு tuning fork எனப்படும் ஒரு இசைக்கவடை அதிர்வடையச் செய்தால் அது ஒரு குறிப்பிட்ட அதிர்வெண்ணில் படத்தில் காட்டப்பட்டுள்ளதை போல அதிரும்.
ஒரு கவடின் அதிர்வெண் 330Hz என்றால், அது ஒரு வினாடிக்கு 330 முறை அதிரும். அந்த அதிர்வு மற்ற இடங்களுக்கும் கடத்தப்பட்டு அந்த இடங்களில் உள்ள அது போன்ற அதிர்வெண்ணில் உள்ளவற்றை அதிரச் செய்யும். இந்த காணொலியில் ஒருவர், ஒரே அதிர்வெண் உள்ள இரண்டு கவடுகளை தனித்தனியே வைத்து அதிர்வடையச் செய்கிறார்.
இடப்புற கவட்டின் அதிர்வுகள் காற்றின் வழியே கடத்தப்பட்டு வலப்புற கவடை அடைகிறது. இரண்டு கவடுகளும் ஒரே அதிர்வெண்ணைக் கொண்டிருப்பதால் வலப்புறக் கவடும் அதிர்கிறது. ஆக அதிர்வுகள் திட, திரவ & வாயுப்பகுதிகளின் வழியே பரவுவதால் ஒத்த அதிர்வெண் உள்ள மற்ற பொருட்களையும் அதிரச் செய்கிறன.
அப்படித்தான் அந்த டகோமா குறும்பாலத்தில் நிகழ்ந்தன. காற்றினால் ஆடிய பாலம் காற்று குறிப்பிட்ட இடைவெளியில் தொடர்ச்சியாக ஏற்படுத்திய அதிர்வும் பாலத்தின் அதிர்வும் ஒத்துப் போனது. கூடவே vertical அதிர்வும் torsional அதிர்வும் சேர்ந்து கொண்டது. விளைவு? Resonance எனப்படும் ஒத்ததிர்வு.
1940ல் நடந்த இந்த நிகழ்விலிருந்து பல பாடங்கள் கற்றுக்கொள்ளப்பட்டன. அதனால் தான் பாலங்கள் மீது படை அணி வகுப்பு மேற்கொள்ளமாட்டார்கள். சரியாக 60 வருடங்கள் கழித்து அதே போன்ற இன்னொரு தவறையும் கட்டுமான பொறியியல் உலகம் செய்தது. இந்த முறை அமெரிக்காவில் அல்ல. இங்கிலாந்தில்...
கருத்துகள்
கருத்துரையிடுக