வெள்ளி பெண்ணா... செவ்வாய் ஆணா....!

ஜெஃப்ரி லேண்டஸ் நாசாவின் ஒரு அற்புதமான விண்வெளி பொறியியலாளர். அவரை ஏன் தற்போது நினைவு கூறுகிறேன் என்றால் அவர் முன்வைத்த ஒர் மிக அற்புதமான யோசனை அப்படி.

அவர் 2003ல் Space Technology and Applications International Forum in Albuquerque, New Mexico,  ஒரு ஆய்வுக்கட்டுரையை வெளியிட்டார். எல்லாரும் நிலவில் குடியேறலாம் செவ்வாயில் குடியேறலாம் என்று பேசிக் கொண்டிருக்கையில் நம்ம ஆள் வித்தியாசமாக வெள்ளிக்கோளில் குடியேறுவது மற்ற இரண்டைக் காட்டிலும் எளிது என்று கூறி அதிர வைத்தார்.

ஆம். புவியைத் தவிர வெள்ளி தான் புவியை போலவே மனிதன் வாழ உகந்த இடம். வெள்ளியின் அடர்ந்த சல்ஃபியூரிக் அமில மேகக் கூட்டத்தின் மேலே பறந்தவாறு மனிதகுலம் பறவைகளைப் போல வாழலாம் என்று முன்மொழிந்தார்.

( Credit: https://www.vice.com/en/article/539jj5/why-we-should-build-cloud-cities-on-venus)

உங்களுக்கே ஒரு அதிர்ச்சி உண்டாகலாம். வெள்ளியை நாம் நரகக் கோள் (hello planet) என்று தான் அழைப்போம். அங்கே போகச் சொல்கிறாரே என்று. அங்கு நிலவும் வெப்பநிலை சராசரியாக  345 C இருக்கும். குளிர்காலத்தில் 230C க்கு வரும். அதன் வளியழுத்தமோ நம் புவியை விட 96 மடங்கு அதிகம். எங்கு நோக்கினும் எரிமலைப் பாறைகள். அன்றைய சோவியத் தான் மிகுந்த ஆர்வத்தோடு 20 ஆண்டுகள் அதனை ஆய்வு செய்தது. அது அனுப்பிய விண்கலங்கள் கூட 1 மணி நேரத்திற்கு மேல் வேலை செய்யவில்லை. அத்தகைய இடத்திற்கா லேண்டிஸ் நம்மை போகச் சொல்கிறார்? 

அவர் திட்டமே வேற லெவல். அதன் முன்னோட்டமும் 80 /90 களில் பார்த்தாகிவிட்டது.

இரண்டு 3 மீ. விட்டமுள்ள வேகா என்ற ஹீலியம் பலூன்களை வெள்ளியின் மேற்பரப்பிலிருந்து 50 - 55 கிமீ உயரத்தில் மிதக்கவிட்டனர். அவை கரியமில (carbon dioxide) வாயுவினால் ஆன காற்றில் இரவுப் பகுதியிலிருந்து பகல் பகுதிக்கு தொடர்ந்து நகர்த்தப்பட்டு 11,000+ கிமீ தூரம் ஆண்டுக்கணக்கில் பயணித்தது. இத்தனைக்கும் மெல்லிய பலூன்கள் தான்.

அந்த 50-55கிமீ உயரம் தான் நம் இலக்கு. அந்த உயரத்தில் வெப்பநிலை 0 - 50 C தான். வளி அழுத்தமோ கிட்டத்தட்ட புவியின் வளி அழுத்தம் தான். அமிலத்தால் பாதிக்காதவாறு அதனை மூடினால் போதும். அந்த பலூன்கள் தான் நம் குடியிருப்பு. ஆனால் ஒரு சிறு மாற்றம். ஹீலியத்திற்கு பதில் புவியில் உள்ளவாறு நைட்ரஜன் + ஆக்சிஜன் கலவையுடன் உள்ள காற்று. நாம் சுவாசிப்பதற்காக. 

ஒரு கிமீ விட்டமுள்ள பலூன் 700,000 டன் எடையை தூக்கி மிதக்க ஆரம்பித்துவிடும். அது போதாதா ஒரு சிறு குடியிருப்பை நிர்மாணிக்க? அதனை பராமரிக்கும் குழுவிற்கு மற்ற கோள்களில் தேவைப்படுவது போல் காற்றழுத்த உடை (pressurised suit) தேவையில்லை. காற்றுபுகா முகமூடி, ஆக்சிஜன் உருளை, கண்ணாடி, அமிலம் பாதிக்காத உடை - இவை போதும்.

 

 

( Credit: https://www.vice.com/en/article/539jj5/why-we-should-build-cloud-cities-on-venus)

இந்த அமிலம் தான் பிரச்சினை. ஆனால் செவ்வாயின் நச்சு புயல் காற்றுடன் ஒப்பிட்டால் அமிலத்தை எதிர்கொள்வது எளிது தான். இது செவ்வாயை விட கதிரவனுக்கு அருகில் உள்ளதால் எளிதாக 4 மடங்கு மின்னாற்றல் எப்பொழுதுமே கிடைக்கும். செவ்வாயை போல புழுதிப் புயற்காற்று அடிப்பதில்லை.

 

( Credit: https://www.vice.com/en/article/539jj5/why-we-should-build-cloud-cities-on-venus)

 

செவ்வாய், நிலா மற்றும் விண்வெளி குடியேற்றங்களில் சூரியக் கதிர்வீச்சு மற்றும் காஸ்மிக் கதிர்வீச்சுகள் மிகப்பெரிய அச்சுறுத்தல். ஆனால் வெள்ளியில் அப்படி கிடையாது. நம் புவியை போலவே பாதுகாப்பானது.

 

குறைந்த ஈர்ப்பு ஆற்றலில் மனிதன், விலங்குகள் அல்லது தாவரங்கள்  அதிக நாள் தாக்குப்பிடிக்க இயலாது. ஆனால் நம் புவியின் ஈர்ப்பு ஆற்றலில் 90% வெள்ளியில் உள்ளது. ஆகவே அந்த அச்சமும் வெள்ளியில் கிடையாது.

 

(A comparison of Earth and Venus, sometimes called "Earth's twin" for its similar size. Image: NASA)

மேலும் வெள்ளியின் மேற்பரப்பில் நமக்குத் தேவையான மண், இரும்பு, அலுமினியம், பொட்டாசியம், மெக்னீசியம், கால்சியம் ஆகியவை கொட்டிக்கிடக்கிறன. ரோபோடிக் (robotic mining) மூலம் அவற்றை மேலே தூக்கிவிடலாம். 

மேலும் தேவைகளுக்கு ஆஸ்ட்ராய்ட் பகுதியில் சுற்றும் விண்கற்களில் பெறலாம். புவி மற்றும் செவ்வாயிலிருந்து விண்கலத்தை ஏவுவதை விட வெள்ளியிலிருந்து குறைந்த ஆற்றல் பாதை (minimum-energy trajectory) வழியே ஏவலாம்.

எப்படி என்றால், விண்கற்கள் மெதுவாக கதிரவனை சுற்றுகிறன. அவை ஒருமுறை கதிரவனை சுற்ற 1300 முதல் 2000 புவி நாட்கள் ஆகும். ஆனாால் வெள்ளி கதிரவனை வேகமாகச் சுற்றுவதால் (225 புவி நாட்கள்) அந்தந்த விண்கற்கள் விரைவில் அருகில் வந்துவிடும்.

 

(An image from Landis's 2003 paper)

புவியின் பகல்/இரவு காலத்தை போல வெள்ளியில் அமைக்க பலூன்கள் அதன் துருவங்களுக்கு அருகில் மிதந்து சுற்றவேண்டும். அப்படியானால் நெரிசல் அதிகரிக்குமே? இல்லை. அந்த பகுதியின் பரப்பு புவி அல்லது செவ்வாய் நிலப்பகுதியை விட 3 மடங்கு அதிகம்.

ஆக, செவ்வாய் ஆணைவிட வெள்ளிப் பெண்ணே சிறந்தவள் .